كتب جودة عبد الصادق إبراهيم
سنة فاتت وعدت من عمرنا … عدت وخدت معاها حلم ما كملش… بسمة جميلة … دمعة حزينة …
طب إيه … إنت هاتمشي كده وتعدي من غير ما تعرفي عملتي فينا ايه… يا ترى قوتينا ولا ضعفتينا اخذتي من همتنا وعزيمتنا ولا أثقلتي خبراتنا .
أوشكت السنة على المضي والإنتهاء … خلاص هانبدأ سنة جديدة كلنا أمل بأنها تكون سنة سعيدة بس علشان العام الجديد يبقى علينا سعيد لازم كل واحد فينا يقف وقفة صراحة ووضوح مع السنة اللي عدت ويراجع حساباته ويسأل نفسه كام سؤال ..أنا كنت عايز أعمل إيه في السنة دي ؟؟ ووصلت لإيه ؟؟ ويا ترى أنا حققت إيه من أهدافي وطموحاتي ,هل يا ترى أنا راضي لما وصلت إليه ؟؟!
طب لو مش راضي …يبقى التقصير منين وإيه السبب ,لازم أكسر شماعة الظروف والحجج واوعى تعلق إخفاقك في تحقيق حلمك وهدفك على شماعة الظروف … والعيشة والناس ,100 حجة وسبب والمهم مابقاش أنا السبب واهرب من المسئولية ,ودي بداية الفشل بجد … دي نهاية الحلم مش بدايته … خليك صريح مع نفسك واعترف بتقصيرك وخليك عارف إن بداية الحل من الإعتراف بالخطأ ….
هو أنا معرفتش أوصل لهدفي ليه ..انا قصرت في إيه ؟؟ اسأل نفسك كده كام سؤال …أنا معرفتش أختار المسار أو الطريق الصيح للوصول للهدف ؟؟ أنا لم أبذل كل جهدي لتحقيق هدفي ؟؟ أنا …أنا…أنا …..؟ يبقى أكيد أنا السبب !
إكسر كل شماعة بتعلق عليها فشلك …إعرف غلطك فين وصلحه …إعتذر لنفسك … عاهدها على الجدية والإلتزام …أطوي ما مضى إبدأ من جديد ,كن واثقا من قدراتك …. أنت تقدر , وبما إننا قاعدين قاعدة صراحة … يبقى الأمر لا يخلو من فنجان قهوة مضبوطة يعدل المزاج …. ونطلق العنان لشوية صراحة كمان … ونعترف مع نفسنا كده بينا وبين بعضنا احنا زعلنا من مين .
وغلطنا في حق مين … إعتذر لمن أخطأت بحقهم فهذه قوة ….وليست ضعف .
قيم علاقتك بكل من حولك ….. ضع كل إنسان في حجمه الصحيح , خليك فاكر إن البالونة هتفرقع في وجه من ينفخها .
قبل كل دول راجع علاقتك بربنا ولو مقصر إلحق نفسك بسرعة قبل ما يفوت الأوان .
تمام كده خلصنا كل السلبيات وشطبنا عليها … يلا بينا ندور على الإيجابيات والحاجات الحلوة في حياتنا وخلينا نشكر ربنا ونقول الحمد لله إن ربنا مد في عمرنا علشان نشكره على كل حاجة حلوة في حياتنا .
الحياة رزق يستحق الشكر … راحة البال رزق … الصديق الوفي رزق …الضحكة الصافية رزق كل حاجة جميلة في حياتنا لازم نحمد ربنا عليها ونسأل الله دوام نعمته علينا .
يلا بينا نبدأ السنة الجديدة نعاهد فيها نفسنا بالإلتزام والجدية في العمل ..نبدأ السنة الجديدة بهدف وحلم جديد نحاول نحققه ونصل إليه … نبدأ السنة الجديدة بالحب ,بالأمل … حب نفسك وصالحها ولو اتكعبلت في الطريق ولا يهمك قوم ونفض هدومك وكمل لسة الطريق في أوله .
ويارب سنة جديدة سعيدة ما فيهاش فراق ولا أحزان ..مافيهاش دموع … فيها كل الخير والسعادة لينا ولأولادنا ولبلادنا وكل عام والجميع بخير .