كتب نزار عبدالقادر صالح
س: الحاصل في سويسرا شنو يانزار ياولدي؟ بسمع في كلام كتير ومتضارب لمن ما قادرة أتابعه، وكل واحد الأيام دي ماعنده شغله بقى محلل سياسي وخبير إستراتيجي؟
ج: شوفي يا حبوبتي، أنا حأحكي ليكي قصة سويسرا دي من بدايتها عشان تكوني في الصورة ومافي معلومة تفوتك.
يوم 23 يوليو الفات، أنتوني بلينكن وزير الخارجية الأمريكي رسل دعوة لناس الجيش وللدعم السريع قال ليهم تعالوا نتقابل ونقعد مع بعض يوم 14 أغسطس في سويسرا، وحيكونوا معانا مراقبين من الأمم المتحدة والإتحاد الأفريقي، ومصر والإمارات.
س: وأجندة المحادثات دي شنو؟
ج: وقف إطلاق النار، وتمكين وصول المساعدات الإنسانية عبر الحدود وعبر خطوط التماس، وتطوير آلية قوية للرصد والتحقق لضمان تنفيذ أي اتفاق مستقبلي.
س: والموضوعات السياسية؟
ج: بلينكن قال في سويسرا ما حنتكلم في قضايا سياسية.
س: الدعم السريع رد على الدعوة؟
ج: أيوة، بعد أقل من 24 ساعة حميدتي كتب في حسابه بمنصة “إكس” “أرحب بالدعوة التي أعلنها السيد أنتوني بلينكن، وزير الخارجية الأميركي، وأُعلن مشاركتنا في محادثات وقف إطلاق النار القادمة في 14 أغسطس 2024 في سويسرا. إنني أقدر الجهود التي تبذلها الولايات المتحدة والمملكة العربية السعودية وسويسرا في تنظيم هذه المداولات المهمة”.
س: وناس الجيش كان ردهم شنو يانزار ياولدي؟
ج: يوم الثلاثاء 30 يوليو، وزارة الخارجية السودانية طلعت بيان بخصوص الدعوة الأمريكية دي ” قالوا فيهو نحنا الطرف الأكثر اهتمام بحفظ أرواح وكرامة الشعب السوداني، وعشان كده حنتعاون مع أي جهة حتوصلنا للهدف ده. بس عشان نجي لسويسرا عندنا شروط وسؤالين للأمريكان لو لبوا شروطنا وجاوبوا لينا على السؤالين حنجي لسويسرا.
س: وشروطهم كانت شنو؟
ج: أول شرط، إنو الأمريكان من الليلة ولقدام يخاطبوا البرهان بصفته رئيس لمجلس السيادة مش بس قائد للقوات المسلحة،
س: صحى الأمريكان ما كانوا بقولوا للبرهان الرئيس البرهان؟
ج: أيوة يا حبوبتي، واشنطن من انقلاب 25 أكتوبر 2021 بتتعامل مع الفريق عبد الفتاح البرهان باعتباره قائد للجيش بس مش كرئيس لمجلس السيادة.
س: والشروط التانية شنو؟
ج: تاني شرط محادثات سويسرا تكون مع وفد يمثل الحكومة والحركات المسلحة المؤيدة للجيش والحركات المسلحة الموقعة على اتفاق جوبا مش بس القوات المسلحة.
وتالت شرط، الإمارات ما تشارك في المحادثات،
ورابع شرط قوات الدعم السريع تفك الحصار المفروض على الفاشر، وخامس شرط قوات الدعم السريع تسمح بمرور المساعدات لنازحي معسكر زمزم، وآخر شرط المحادثات تتم في جدة و “منبر جدة” يكون هو المنبر الأساسي بخصوص الأزمة السودانية وتنفيذ “إعلان جدة” الموقع يوم 11 مايو 2023م لحماية المدنيين وتوصيل المساعدات الإنسانية قبل الذهاب لسويسرا.
س: والسؤالين هم شنو للأمريكان؟
ج: السؤال الأول: لييه حددتوا تاريخ 14 أغسطس، وإنتو عارفين انه اليوم ده مصادف العيد ال70 للقوات المسلحة السودانية؟
والسؤال الثاني: شايفين كيف مستقبل قوات الدعم السريع؟
س: أها وبعد ده الحصل شنو؟
ج: بعد كم يوم، ناس البرهان قالوا للأمريكان نحنا عاوزين نقعد معاكم في جدة قبل سويسرا، عشان نعرف رأيكم في الشروط، ونسمع إجاباتكم على السؤالين وكمان عاوزين نعرف جدول الأعمال بتاع محادثات سويسرا؟.
س: والأمريكان وافقوا يقابلوا ناس الحكومة قبل سويسرا؟
ج:أيوة المبعوث الأمريكي سافر لجدة، ويوم الجمعة 9 أغسطس، البرهان رسل وفد من الحكومة لجدة برئاسة محمد بشير أبو نمو (وزير المعادن وولد عم منى أركو مناوى رئيس حركة تحرير السودان) عشان يقعدوا مع المبعوث الخاص.
س: والمبعوث الأمريكى رد عليهم بشنو؟
ج: توم بيريلليو، قال ليهم أوعدكم من الليلة حنخاطب البرهان برئيس مجلس السيادة، وقال ليهم الدعوة وجهناها للقوات المسلحة السودانية مش للحكومة، و محادثات سويسرا حتناقش قضايا فنية متعلقة بوقف إطلاق النار وتسهيل وصول المساعدات الإنسانية وحماية المدنيين، وماحناقش في المرحلة دي قضايا سياسية عشان يكونوا فيها مدنيين. وسويسرا ما بديل لمنبر جدة بل مواصلة للمنبر، وبخصوص عدم مشاركة الإمارات في المحادثات بصفة مراقب طلبكم ده مرفوض.
س: صحى ناس البرهان قالوا المحادثات لازم تكون في جدة؟
ج: أيوة
س: مش السعودية وافقت للأمريكان يانزار ياولدي على نقل “منبر جدة” لسويسرا؟
ج: أيوة يا حبوبتي، مش وافقت وبس، كل الصرف بتاع محادثات سويسرا المستمرة دى من السعودية
س: عارف يانزار ياولدي، الحاجة دي بتذكرني بالمثل السوداني البقول “سيد الحق راضي شن دخل القاضي”
ج: بالظبط كده يا حبوبتي
س: ووصلوا لإتفاق مع المبعوث؟
ج: أبدا، أبونمو صرح يوم الأحد 11 أغسطس، قال ما وصلنا لإتفاق مع المبعوث الأمريكي وأنا بوصي البرهان ما يشارك في محادثات سويسرا.
س: والمبعوث قال ليهم شنو؟
ج: قال ليهم محادثات سويسرا قائمة قائمة، جو ناس الجيش وله ما جوا، وركب طيارته وسافر من جدة مباشرة لجنيف.
بكرة نواصل ونشوف المحادثات ومشاركة الإمارات والسيناريوهات المتوقعة.
سويسرا 19 أغسطس 2024