بقلم ا.د فتحي الشرقاوي
عندما نجد طفل صغير مشغول وشاغل نفسه ..
بالذهاب للسايبر ولعب البلاي ستيشن والجيمز ،نقول حينئذ أن هذا أمر عادي بحكم إنه مازال عيل ودماغه طايشه وتفكيره على قده ومداركه محدوده وبالتالي قد نتغاضى بعض الشيء عن تصرفاته كطفل ونضع له بعض الضوابط والمحاذير لكن المصيبه السودا والمتلتله لو دخلنا النهارده اي قهوة أو سايبر ممكن تصاب بهلع من كثرة عدد الشباب اللي طوال الوقت قاعد جواهها،اللي بيسجر واللي بيشيش واللي ماسك موبايله وسرحان واللي يلعب بلاي ستيشن واللي بيهرج واللي بياكل الخ الغريب في الموضوع إن معظم هؤلاء الشباب متجوزين حديثا وفاتحين بيوت ولهم زوجات ويمكن مخلفين طفل وطفلين
،لما الموضوع ده يبقى على فترات زمنيه نقول ماشي اهو تجديد وترفيه لكن إنه يكون البرنامج اليومي للزوج كده نكون دخلنا في حاره سد ومسدوده لأن ده معناه إننا أمام زوج في جسم شاب وهو في الحقيقة بدماغ وتصرفات طفل خالي تماما من اي احساس بمسؤلياته اللي في رقبته مراته وأولاده وبيته عارفين يعني ايه شاب صغير متزوج قاعد طول الوقت على المقاهي والسايبرات مع زملائه
أولا :
يخلع من تحمل أي مسؤلية تخص مراته وبيته وأطفاله مما يزيد من عبأ المسؤليه الملقاه على عاتق زوجته مما يعود عليها قطعا بالضررنفسيا وانفعاليا وصحيا ونرجع نشتكي من سوء التوافق الزواجي ونقول بيجي منين⁉️
#ثانيا..
بقاء الزوج الشاب أكبر وقت ممكن مع المقاطيع زمايله خارج البيت في هذه الأماكن قد يتيح للزوجه مساحة كبيرة
من الفراغ قد يتم استغلالها بشكل خاطئ إذا كانت تحمل بداخلها الإستعداد للانحراف ‼️
#ثالثا..
بقاء الزوج الشاب فترات طويلة يوميا خارج البيت بعيدا عن مراته وأبنائه قد يؤدي إلى ابتعاده النفسي والجسدي ليس عن الزوجه فقط انما ابتعاده أيضآ عن تربية وتوجيه وإرشاد أبنائه واطفاله الصغار،وبعدين نرجع نقول ونشتكي هى العيال مش متربيه ليه⁉️علشان بسلامته ابوهم راميهم وسايبه ولا بيقعد معاهم ولابيتكلم معاهم ولا اي نيله.
#رابعا..
القعده على المقاهي والسيبارات اكيد محتاج لزوم الفشخرة والمنظرة محتاجه فلوس والفلوس دي البيت اولى بيها في ظل الظروف الزفت وبعدين نشتكي من ضيق ذات اليد
#خامسا.
لما انت طول النهار في شغلك وطول الليل في المقطوعة إللي اسمها قهوه ولا كافيه طيب انت امتى هتقعد مع مراتك وتتكلموا مع بعض عن بيتكم ومشاكلكم واطفالكم.
بص ياننوس عين بابا وماما لو انت مش قد الجواز وتحمل المسؤليه ياريت تخلع، بيتك مش لوكانده ولا أوتيل تيجي تلبس وتغير فيه وتاكل وبعدين ترجع لمقرك الدائم اللي هو القهوة والسايبر وشلة المقاطيع،البيت ده سكن وموده ورحمه وأمان واطمئنان وفي ظل الهباب ده أنا بقترح بدل ما والد العروسه يسأل العريس عن وظيفته ومرتبه وشقته وتجهيزه لها، أصبح من الضروري أن يسأل سؤال جوهري ،إنت بتقعد على القهوة مع زمايلك كام يوم في الاسبوع وبتقضيها بلاي ستيشن كام ساعةوبتصرف على المخروبه دي قد إيه من مرتبك وبكده يضمن الأب استقرار بيت بنته ومستقبلها معاه.إنها صرخة تحذير قبل فوات الأوان،مش مجرد خاطره بل واقع لدى الكثير من الشباب المتزوج الأعزب.
أ. د. فتحي الشرقاوي
أستاذ علم النفس
جامعه عين شمس