كتبت ليزا رضا العيسوى
كشف أحمد شوبير الإعلامي بقنوات أون تايم سبورتس، حقيقة رحيل خالد بيبو مدير الكرة بالنادي الأهلي، وتعيين علاء ميهوب بدلًا منه.
وقال شوبير خلال حديثه عبر إذاعة أون سبورت: “في معلومة ظهرت امبارح وانتشرت كتير جدا قولت مش هتكلم فيها علشان تكون معلومتي مؤكدة 100%”.
وأضاف: “أنا هحط نفسي مكان خالد بيبو وأنا بدأت اشتغلت مع الأهلي من كام شهر وخدت كأس السوبر وبعدها كأس مصر ثم خدت كأس إفريقيا ولسة الدوري شغال ولسة كأس مصر شغال البطولة اللي يعتبر خسرتها هي كأس السوبر الإفريقي أمام اتحاد العاصمة في البداية ودي مكانتش بسبب إداري لما ابقى قاعد وابص الاقي ترشيح فلان الفلاني مديرًا للكرة الراجل كسبان بطولات والدوري شغال والكاس شغال وفي سوبر مصري وسوبر إفريقي”.
وأكمل: “أنت حضرتك لو مكان كابتن خالد بيبو وبتسمع الحاجات دي وتقرا الحاجات دي تعمل ايه؟ هو ليه الحملة على كابتن خالد بيبو بالشكل ده.. وبعدين النادي الأهلي عمرك جيت في يوم من الأيام شوفته في نص الموسم بيغير مدير كرة؟ يعني ممكن مدير فني اه النتايج متراجعة فالجهاز الفني يمشي لكن عمرها ما حصلت انه يمشي مدير كرة في نص الموسم وبعدين يمشي ليه من الأصل؟ أنت هتقيم في نهاية الموسم يعني كابتن سيد عبد الحفيظ فاز بكل البطولات واتفاجئنا انه مشي”.
وواصل: “أنت انهاردة عاوز ايه من خالد بيبو؟ يعني يكسب التقسيمات في التمرين ولا ايه؟ خسارة الأهلي في الدوري الإفريقي كانت خسارة مادية يعني بدل ما ياخد 3 مليون ولا 4 مليون خد مليون ونص لكن بطولة لا بتقدم ولا بتأخر ولا بتأهل لأي حاجة خالص”.
واختتم شوبير حديثه: “الاسم اللي تردد كابتن علاء ميهوب هو مدرب كرة محترم لكن ملوش تجربة إدارية تجربته الإدارية الوحيدة في مودرن فيوتشر ومكتملتش وهو بيحب يدرب وعجبني أنه طلع قال محدش كلمنى انا قريت زيى زى بقين الناس”