كتب جودة عبد الصادق إبراهيم
قرر البنك المركزي في اجتماع لجنة السياسة النقدية تثبيت سعري عائد الإيداع والإقراض لليلة واحدة وسعر العملية الرئيسية للبنك المركزي عند مستوي 18.25%، 19.25% و18.75% على الترتيب. كما تم الإبقاء على سعر الائتمان والخصم عند مستوي 18.75% وده كان متوقع في ظل البيانات الإيجابية عن التضخم واستقرار الأسواق.. يعني ايه تثبيت وايه تأثيره على السوق السوداء للدولار.
تثبيت سعر الفايدة معناه باختصار إن الأمور مستقرة على كل قطاعات الاقتصاد مش بس معدلات التضخم ومعناه الأهم استقرار في أسواق الصرف ومعناه مفيش تعويم وهنا الضربة القاضية السوق السوداء لأنها عادة بتعيش على اضطرابات أسعار صرف الدولار وارتفاع الفائدة اللي بيجيب تعويم يعني المعبد اتهد على كل التجار إللي خزنوا الدولار في الشهور اللي عدت ومفيش قدامهم حل غير إنهم يتخلصوا من الدولار اللي لموه بالغالي من الأسواق ولو هيبعوه بالخسارة.
تثبيت سعر الفايدة معناه كمان إن مفيش أزمات قوية هتحصل في أسواق الصرف بعد بيان المركزي امبارح واللي اتكلم على ارتفاع موارد النقد الأجنبي من الدولار من موارد السياحة وتجارة التجزئة وبقية الموارد ومع قرار المركزي وصيف ليه قرارات مقاطعة رجال الأعمال والمصنعين والشركات للسوق السوداء ده بينهي أي تطلعات لعودة تجار العملة للسوق تاني.
التثبيت معناه شهادة نجاح للبنك المركزي والسياسات المالية اللي حكمت السوق وحاصرت السوق السوداء للعملة ونجاحها في توفير الدولار لكل قطاعات الدولة اللي محتاجاه وكمان رسالة طمأنة للناس إن الأمور بدأت فعلا تتحسن والايام الصعبة مش راجعة.