بقلم نزار_عبدالقادر_صالح
س: آخر سؤال سألتك ليهو المرة الفاتت يانزار ياولدي كان، ناس الحكومة السودانية عملوا شنو بعد ما طلبت بريطانيا عقد الجلسة الطارئة؟
ج: أول حاجة عملوها ناس البعثة الدائمة في جنيف يا حبوبتي، إتصلوا بوزير الخارجية محي الدين سالم وقالوا ليهو ضروري تجي جنيف تحضر الجلسة دي وحنعمل ليك لقاءات تانية مع شخصيات مهمة.
س: وتاني عملوا شنو ناس البعثة الدائمة في جنيف يانزار ياولدي؟
ج: أول أمبارح الأربعاء 1 يوليو، رسلو خطاب لكل البعثات الدبلوماسية في جنيف باللغتين العربية والإنجليزية
س: قالوا فيهو شنو يانزار ياولدي؟
ج: قالوا للبعثات نحن عاوزين نوضح ليكم كم نقطة مهمة قبل جلسة الجمعة، أول نقطة لازم تعرفوا بأنه مدينة الأبيض دي خاضعة لسيطرة الحكومة ولقواتها المسلحة، وتاني نقطة، قوات الدعم السريع دي إرتكبت إنتهاكات فظيعة في المدينة مستخدمة طائرات مسيرة إستراتيجية مزودة بصواريخ، وتالت نقطة ودي أهم نقطة أنه دولة الإمارات العربية المتحدة قاعدة تقدم دعم عسكري وسياسي للمليشيا.
س: وعن القرار المتوقع صدوره من مجلس حقوق الإنسان، ما قالوا حاجة يانزار ياولدي؟
ج: قالوا أبدا ما حنوافق بأي دور حيعطيه مجلس حقوق الإنسان لبعثة تقصي الحقائق بخصوص الوضع في مدينة الأبيض لأنه أنحنا أبدا ما معترفين بيها وصوتنا ضد إنشائها، نحن عندنا آليات وطنية قادرة تعمل نفس الشغل البتقوم بيهو البعثة، وماعندنا مانع يتم تكليف المكتب القطري للمفوض السامي في السودان يقوم بالرصد وبالتوثيق.
س: والليلة الحصل شنو في الجلسة الطارئة يانزار ياولدي؟
ج: الجلسة بدت الساعة عشرة صباحا وإنتهت الساعة واحدة الظهر، إتكلم فيها المفوض السامي لحقوق الإنسان، ومنى رشماوي ممثلة لبعثة تقصي الحقائق الخاصة بالسودان، وممثل لنظام الإجراءات الخاصة بالأمم المتحدة، ورابع واحد إتكلم وزير الخارجية السوداني محى الدين سالم، وبعد ما خلص وزير الخارجية من كلمته، رئيس المجلس منح الفرصة ل32 دولة عضو بالمجلس من أصل 47 دولة، وبعدهم منح الفرصة ل44 دولة مراقبة ول17 منظمة غير حكومية عشان تدالي ببياناتها.
س: يعني الاتكلموا الليلة في الجلسة الطارئة 96 شخص يانزار ياولدي؟
ج: شخص أيوة يا حبوبتي، لكن لازم أوضح ليكي في دول اتناولت الكلمة نيابة عن مجموعة من الدول، مثلا ممثل الاتحاد الأوروبي إتكلم بإسم كل دول الاتحاد الأوروبي، وفنلندا اتكلمت نيابة عن عدد من الدول، وآيرلندا اتكلمت نيابة عن تحالف فيهو عدد من الدول اسمه ” تحالف منع الفظائع في السودان”، وكمان كينيا اتكلمت نيابة عن مجموعة الدول الأفريقية.
س: المفوض السامي قال شنو يانزار ياولدي؟
ج: قال وثقنا عمليات إعدام بإجراءات موجزة واختطاف وتعذيب وعنف جنسي ، وقال كارثة أخرى في حقوق الإنسان تتكشف حول مدينة الأبيض المحاصرة، وحث المجتمع الدولي على التحرك لمنع تكرار فظائع الفاشر.
س: ومنى رشماوي عضو بعثة تقصي الحقائق قالت شنو؟
ج: منى قالت، يؤسفنا أن نجتمع لمناقشة أوضاع حقوق الانسان في مدينة أخرى في السودان، عندنا فيديوهات بتوضح إستعداد قوات الدعم السريع لدخول مدينة الأبيض، وإنتهاكات القوات المسلحة وحلفائها، واتكلمت كمان عن أهمية حماية المدنيين، ودعت كافة الأطراف لإحترام القانون الدولي لحقوق الانسان والقانون الانساني الدولي، وطلبت من الدول الداعمة لاستمرار الحرب التوقف.
س: ووزير الخارجية قال شنو يانزار ياولدي؟
ج: قال حكومتنا تكن كل تقدير لمجلس حقوق الإنسان ولكافة أجهزة الأمم المتحدة، وشكر دول الجوار الاستقبلت السودانيين ، وقال حكومتنا منفتحة لوقف الحرب بالوكالة، واتكلم عن خارطة الطريق بتاعت يوم 10 مارس 2025، ومبادرة حكومة الأمل 22 ديسمبر 2025، وقال المليشيا دي ما حتدي أي إهتمام لقراراتكم ولبياناتكم، والفاشر بيان بالعمل، وطلب تصنيفها جماعة إرهابية، وطلب من مجموعة الدول الطلبت عقد الجلسة الطارئة دي مخاطبة الإمارات ودول الجوار بوقف دعمهم للمليشيا، وقال حكومتنا أبوابها مفتوحة للمكتب القطري وللخبير المستقل المعني بحالة حقوق الإنسان في السودان
س: وصحى وزير الخارجية إنسحب من الجلسة الطارئة يانزار ياولدي؟
ج: ده كلام ما صاح يا حبوبتي، أنا قاعد جوه القاعة من بداية الجلسة لنهايتها، كيف ينسحب من الجلسة وهو جايي مخصوص ليها من بورتسودان، وشنو الحصل داخل القاعة عشان يخليهو ينسحب
س: ممكن وجود بعثة تقصي الحقائق؟
ج: برنامج الجلسة يا حبوبتي معروف للوزير قبل ما يصل لجنيف، وقبيل أنا قلت ليكي الوزير اتكلم مباشرة بعد ما منى رشماوي عضو بعثة تقصي الحقائق خلصت كلمتها، وكمان لازم الناس تعرف أنه الوزير بعد ما خلص كلمته قعد واستمع لكلمات كل الدول الأعضاء في المجلس (32 كلمة)، واستمع لكلمات عدد من الدول المراقبة، وبعدها طلعوا هو والمفوض السامي لحقوق الإنسان من القاعة.
س: يعني مافي أي إنسحاب؟
ج: أبدا يا حبوبتي، الوزير طلع عشان كان عنده إجتماع مع المفوض السامي لحقوق الإنسان، ووكالة سونا للأنباء نشرت خبر لقائه مع المفوض السامي.
س: شكرا يانزار على التوضيح المهم، بس عاوزة أعرف منك مشروع القرار فيهو شنو؟بكرة بحكي ليكي يا حبوبتي
#سويسرا 3 يوليو 2026م
https://www.facebook.com/share/19494xnJT4/?mibextid=wwXIfr