بقلم ا.د فتحي الشرقاوي
دماغي هتنفجر ،نفسي دماغي تقف شويه..على طول دماغي شغاله، الأفكار مش سيباني لا قادر اتخلص منها ولا عارف أنام لدرجة لو مفيش حاجه افكر فيها..أفكر إزاي افكر ‼️ ناس كتير تعاني من التفكير الزائد لدرجة إعاقتهم عن مواصلة توافقهم اليومي الطبيعي نتيجة شعورهم بالتعب والانهاك والشعور والقلق ،يعيشون حالات من الطاقةالسلبية والمعاناة من الوساوس والمخاوف غير المبررة، غير قادرون على الإنجاز وياريت الموضوع يقف عند هذا الحد لديهم..لأ..طبعا الأوفر ثينكينج يؤثر في الجهاز الهضمي (التهاب الامعاء والقولون)السؤال هنا كيف نقلل من حدة الاوفرثينكنج ⁉️‼️
اولا.بمجرد ماتبدأ دماغك تستحضر موضوع معين..
قل لنفسك بشكل مباشر انا لازم احدد نقطة محددة ودقيقة في هذا الموضوع وافكر فيها فقط واخرج منها بنتيجه معينه وبعدها أقفل الموضوع حتى لا تتشعب أفكاري ولا اتشعب واتفرع في اتجاهات تانيه ملهاش علاقة..
بالفكرة التي تم تحديدها
وبهذا الأسلوب تكون.. استثمرت تفكيرك في نقطه مفيده..
ثانيا.إهمس لنفسك وقل لها ياترى ايه اللي كسبتيه من كترة.التفكير كل الفترات الطويلة اللي فاتت غير القلق والتوتر وتشتت الانتباه والانهاك وتعب الصحة وفي الاخر ماحققتيش اي انجاز
إن هذا الحديث الصارم لنفسك من انفسك قد يردعك
ويوقف سيل الانخراط في الافكار عديمة الجدوى
ثالثا.حاول تعمل تعديل وتغيير ايجابي في اسلوب ونوعية حياتك بحيث يكون عندك أهداف حقيقيه تريد تحققها.لأن انشغالك بها سيجعلك عملي اكتر منك مفكر،بمعني مش هتحرق بنزين على الفاضي من غير سواقه
رابعا أول ماتشعر بوقوعك فريسه للافكار التهويلية المزعجة غير نشاطك
( اخرج،غير المكان، اتفسح
،العب اي لعبه احضر اي مناسبه ، تواصل هاتفيا مع شخص ما، المهم ماتقعدش مع دماغك
خامسا..درب نفسك كيف تضع كل شيء في حجمه الطبيعي لأن الاوفرثينكنج بيكون نتيجة لعدم قدرتك على الحكم الصحيح على الأفراد و إدارة الموضوعات واعطائك لها حجم اكبر من احجامها الحقيقية[ تهويل]..
سادسا،جانب كبير من الاوفرثينكنج اللي عندك المثاليه، إنك تريد انجاز اي شيء زي الكتاب مابيقول،من الاخر كده عاوز شغلك وعلاقاتك وموضوعاتك كلها دقيقة زي المسطرة، وأنا بقولك هذا صعب للغاية لأن الكمال لله وحده
سابعا. كثير من افكارك عادة ماتكون سوداويه وترتبط من حيث حدوثها بالمستقبل لذلك ياريت تؤمن بأن الغيب بيد الله وكلنا لا نعلم مصائرنا القادمة،إن هذا الاتجاه القدري التوكلي على الله سيقلل كثيرا من ضغط افكارك السوداوية
مع خالص امنياتي لكل من يعانون من الاوفرثينكنج براحة البال والهدوء والاستقرار النفسي
ا.د فتحي الشرقاوي
استاذ علم النفس
جامعة عين شمس