قال الرئيس عبد الفتاح السيسى، “حكاية أكتوبر” هي حكاية ملهمة ولا تنتهي، والنصر الذي تحقق لم يكن نصر بسيط، فهو نصر وراءه إرادة شعب كامل رفض الهزيمة وتحدى نفسه وظروفه، وتحدى التحدي نفسه.
وتابع خلال احتفالية اتحاد القبائل العربية والعائلات المصرية بمناسبة ذكرى انتصارات أكتوبر باستاد العاصمة الإدارية الجديدة.: “اللي انتوا بتشوفوه دلوقتي دا الظروف اللي بنعيشها بعد 67، وكل الناس والعالم و الخبراء والمهتمين بالمواضيع العسكرية والتحديات اللي كانت بتجابهها الدولة المصرية في الوقت دا خاصة على الصعيد العسكري، كانوا بيقولوا مستحيل، خط بارليف ومانع قناة السويس والتفوق الكبير، والمقارنة اللي كانت مش في صالحنا، كله كان بيقول مفيش فرصة نجاح، لكن الشعب المصري، رفض دا وأصر وتحدى نفسه وحقق الانتصار، وعشان كده الانتصار دا غالي أوي واتدفع فيه كتير من دماء المصريين، والسلام اتدفع فيه كتير أوي، وعلى رأسه الرئيس الراحل محمد أنور السادات دفع فيه كتير، دفع فيه حياته ودمه عشان فكرة كانت وقتها”.
وواصل: “احنا دلوقتي في تحديات قدامنا؟ أكيد، لكن بنفس الروح والإرادة وزي ما نجحنا لازم تكونوا متأكدين إنه بفضل الله سبحانه وتعالى وبالعمل والإصرار والمتابعة نعبر كل تحدي قدام مننا، ونصل بفضل الله إلى كل اللي بنتمناه مع بعضنا”.
ويشهد الرئيس عبد الفتاح السيسى، احتفالية اتحاد القبائل العربية والعائلات المصرية بمناسبة ذكرى انتصارات أكتوبر باستاد العاصمة الإدارية الجديدة.