مع اقتراب حلول عيد الأضحى المبارك، قد تزداد المشادات بين الأزواج، مما قد يؤدي إلى نشوب خلافات ومشاجرات بينهم لاختلافهم الأراء بينهم، لذا طرحنا سؤال للمتزوجين لمعرفة السبب الحقيقي وراء” خناقة العيد”، وكانت الإجابات، كما يلى:
هنقضي العيد فين؟
قالت نادية في حديثها:” خناقة العيد بدأت عندنا من ثلاث أيام بسبب أول يوم العيد هنقضيه فين، في حين أننا متفقين أننا نقضي العيد عند أهلي، لأننا العيد اللي فات كان عند أهله، لكنه خلف وعده معايا، وصمم نقضيه مع أهله، فبفكر أسيب البيت أروح وأقضيه مع أهلي” .
بسبب حاجة حصلت من 8 سنوات:
وتقول أميرة:” النهاردة كانت الخناقة وعشان حاجة حصلت من 8 سنين، جاي يفتكرها النهاردة كلمة منه كلمة مني قامت العركة”.
3000 جنيه مصاريف كوافير :
وتقول حسناء:” كنت عايزة 3000 جنيه عشان عايزة أروح صالون التجميل، قالي هاتي الـ 3000 جنيه وأنا أعملك شعرك أو ممكن تقصي شعرك خالص، الموقف صعب، دا يعتبر أول عيد لينا مع بعض”.
بدأنا الخناقة من 10 أيام:
وتحكي ياسمين:” في كل عيد لازم نتخانق من غير سبب، وبتطور لخناقة كبيرة تستمر لحد بعد العيد بأيام، والمرة دي بدأنا الخناقة من 10 أيام ومش بنتلكم بسبب إن الأكل كان فيه ملح زيادة”.
بيتخانق عشان يهرب من العيدية :
فيما قالت أية:” زوجي فاكر ليا الجلابية اللي اتحرقت من 6 سنوات، وفاكر يعمل عليها مشكلة النهاردة، وحلف 100 يمين أني مش هكوي جلابية العيد ده ومفيش عيدية، حاسة أنه بيخترع أسباب عشان يهرب من العيدية”.
عيد لحمة مش عيد عيدية:
ويقول إبراهيم:” زوجتي مش عارفة تفرق مابين عيد الأضحى وعيد الفطر بقولها ده عيد لحمة، مصممة وعايزة العيدية، وعايزة تشتري ملابس للعيد، دائما بحس أن هي مش فاهمة وأنا بحاول اأفهمها بتزعل” .
عشان نسيت أرد على الواتس اب من سنة:
يقول أحمد:” أنا متزوج من 10 سنوات مفيش عيد أو أي مناسبة تعدي علينا من غير خناقة، بدون أسباب ممكن تفتكرلي موقف حصل زمان ونبدأ الخناقة، وفي مرة اتخانقنا عشان من سنة كانت بتاخد رأيى في ملابس للعيد وأنا عملت سين ومارديتش على الواتساب”.