زواج ترانزيت “الزواج علي الطريقة الحديثه”

كتبت زيزي غريب

عندنا حالات طلاق كتير في مصر .
احد اهم أسبابها ان الناس بتختار الشخص الغلط نقول تاني و تالت ورابع وعاشر ما تدخلش مشروع جواز .والطرف التاني فيه عيب قاتل.
او فيه طبع مرفوض بالنسبالك ومش هتقدر تتحمله . وتكمل معاه علي أمل انه يتغير.

عاوزة تتجوزي واحد بيصلي …استني اللي بيصلي وماترضيش بواحد مابيصليش وتقولي ربنا هايهديه.

عاوز تتجوز واحدة رفيعة…ما تروحش تخطب بنت مش رفيعة وتطلب منها انها تعمل دايت وتفضل تتخانق معاها علي الموضوع ده .

عاوز تتجوز واحدة لابسه نقاب ومش قادر تتخيل ان زوجتك من غير نقاب . دور علي واحدة لابسه نقاب ….ماتروحش لواحدة مش منتقبة ومش مقتنعة بيه وتفضل تتخانق معاها عليه٠

عاوزة تتجوزي واحد رومانسي…ماتروحيش تتجوزي واحد عملي جدا ومالوش في الكلام والحركات وتقولي هاغيره بعد الجواز…في الغالب هترجعي تشتكي من الحرمان العاطفي.

عاوز تتجوز واحدة مابتشتغلش…ماتروحش تتجوز واحدة بتشتغل وناجحة في شغلها وعندها طموح وظيفي وتقول هاقعدها في البيت.

مابتعرفيش تتعاملي مع الشخص العصبي خالص… ماتتجوزيش واحد عصبي علي أمل ان ربنا هايهديه وهيبقي هادي مرة واحدة.

عاوز تتجوز واحدة كيوت وهادية وده موضوع مفصلي بالنسبالك …ماتتجوزش واحدة عنيدة ولمضة وتفضل تتناقر معاها طول العمر…روح اختار واحدة كيوت.

عاوز تتجوز واحدة مكحرتة وبتشيل مسئولية … ماتتجوزش واحدة خبرتها قليلة وتفضل طول الوقت تحسسها انها بروطة وخيبة.

ليه؟
اولا : ماحدش يا جماعة بيتغير بعد الجواز بعد ما أتربي علي حاجة او علي طبع معين لمدة ٢٥ او٣٠ سنة ( الا في حالات نادرة ).

ثانيا : حاجة زي الزفت انك بعد ما توافق انك ترتبط بحد ….انك تحسسه دايما انك مش متقبله…شعورك انك مش مقبول من شريك حياتك شعور في منتهى القسوة.

ثالثا : لان شريك حياتك فيه عيب او طبع انت مش قادر تتقبله…الموضوع ده بيبقي نقطة توتر في حياتكم بتجيب مشاكل بشكل مستمر

اللي بيقولك ان كل الناس بتتغير بعد الجواز ..ده واحد بيحاول يقنعك بحد هو مقتنع بيه حتي لو مش بيناسبك انت.

فى كلمتين لله.
نصيحه لكل ام عارفة إن بنتها مش بتاعت عيشة ومسؤولية ومش هتنفع تفتح بيت ..
خليها جنبك يا ست الكل مترازيش بيها حد وترجعوا تقولوا ده طلع فيه وفيه وتدخلوا محاكم والحوارات دى
جالها راجل عاوز الحلال عرفيها يعني ايه مسئولية الجواز . الجواز مش حبة رومانسية ودلع وبرفان وشكل حلو وبس . لا عرفيها أنه عاوز يأكل ويشرب وهدوم تتغسل وليلة تانية خالص .

عرفيها انها هتشوفه ومن ساعة ماتقول موافقة عليه يبقى مفيش رجوع ..

عرفيها أنها يوم ماتطلع من بيت ابوها متجيش غير زائرة زى ما أهلنا قالوا ..

عرفيها أنها تستر وتعيش على اد اللي موجود وطالما جوزها بيشتغل وبيجيب القرش ومش ماشى في سكة حرام تشيله على دماغها ..

إنما لما تكونى عارفة أن بنتك مش بتاعت عيشة وكارهة جوزها وراجعة غصب عنها ومش عاوزة تعيش يبقى ايه في دماغك ؟

عاوزة العفش والقايمة والدهب ومتطلعيش خسرانة .
لا والله دى مش خساره ده مال حرام داخل عليكى لما تكونى انتى مش عاوزه تعيشى وعاوزة كل حاجة يبقى مال حرام لأن ربنا قال امساك بمعروف أو تسريح بإحسان وعرف كل نقطه وكل حق بالنسبة للبكر والثيب .

والعرف بيقول اللى بيبيع الجمل مبينقيش فى قراضه . طالما مش عاوزه الشرع يحكم ..

نصيحة لأى إتنين هيتجوزوا بلاش خلفة أول سنه لحد ما تعرفوا هتكملوا وتستحملوا تعيشوا مع بعض ولا لأ ..

الناس مختلفين..
وكلنا فينا عيوب …وماحدش فينا ملاك … لكن لما تتجوز اختار حد تقدر تتعايش مع عيوبه وطباعه… عشان لو الطباع دي ماتغيرتش ( وده اللي هيحصل في الغالب) تكمل معاه وانت راضي ومتقبله

وربنا يصلح الأحوال
الإرتباط براجل بتاع شغل و شقى مش مناسب لكل النساء

وعلشان كده أغلب بنات العصر ده بيفضلوا الراجل “الفاضي” اللي مالهوش نظره خاصه للحياه وسقف طموحه واطي..
حتى و إن قالوا عكس ذلك،

بيفضلوا اللي بيمنحهم كل الوقت اللي في العالم و وجوده في الحياه يكون متمحور حواليهم هم فقط، لا شيء ولا أحد سواهم..

الإرتباط براجل شقيان بيعني التسليم بأنه مش دايماً هايكون حاضر معاكي و موجود رهن إشارة هرموناتك..
مش هايقدر يوفي إلتزاماته الحسيه و العاطفيه تجاهك برتم ثابت وملتزم ومنضبط على مدار الساعه، ولا كأنه مرتبط بكول سنتر..

حالته الذهنيه مش هاتسمحله طول الوقت يُلقط كل شاردة و واردة و كل تلميح وكل تفصيله مرئيه وغير مرئيه..

حالته الجسديه مش دايماً هاتسمحله بأنه يكون لسه راجع البيت يستريح من شغل وشقى، عشان يلبس وينزل يخرج تاني في كل اللحظات اللي بتطق في دماغك تخرجي..

الشارع اللي بالنسبه للبنات خروج و فسحه وإنبساط، بيبقى بالنسبه للراجل الشقيان دورة جديده من القرف والزحمه والصداع وتشغيل الدماغ والنفسيات والعقليات المتفاوته..

الراجل اللي أغلب وقته بره البيت بيسعى على أكل عيشه، والله الجنه بالنسباله بتكون في رجوع البيت و حمام دافي و سرير مريح و لُقمه تسد جوعه وشوية هدوء يفصل بيهم عن صخب الوَش اللي كان عايشه طول اليوم..

الملامح مرهقه، الجسم مبقاش زي ماكان، الهندمه والشعر والشياكه و الذهن والعقل مش حاضرين بكفاءة أول اليوم..

أما الحلو اللي بيبقى متواجد على مدار الساعه ورهن الإشاره وبيسهر يدردش معاكي للصبح و حاضر طول الوقت، بيبقى حلو خلال المرحله دي بس، وبتتجوزوا،
بس ساعتها إنتوا الاتنين بتدوروا على حد يصرف عليكوا ويفتحلكوا بيتكم و ما أكثر البيوت اللي قائمه على كده دلوقتي، و في النهايه البيت بيتقفل..!

اخيرا وليس اخرا
الشاب المستهتر اللي عايش في الحلاوه بلاش تدخل بيوت الناس وتبهدل بنات الناس . وبلاش لنا ابني متربي احسن تربيه وهو يكون عاق

البنت المدلعه اللي مقضيها كافيهات وخروجات وتنام المغرب وتصحي طول الليل خليها في بيت اللي ربوها هما أولي بالتربيه الغلط
اتقوا الله الزواج موده ورحمه وسكن
ليس ترانزيت لبعض المستهترين