كتب نزار عبد القادر صالح
س: الشكوى كان مضمونها شنو يانزار ياولدي؟
ج: يوم 6 مارس 2025م، وزير العدل قدم نيابة عن الحكومة السودانية دعوى قدام محكمة العدل الدولية، قال فيها أن الإمارات إنتهكت التزاماتها في اتفاقية منع جريمة الإبادة الجماعية والمعاقبة عليها تجاه قبيلة المساليت في دارفور.
س: وعلاقة الإمارات شنو بالمساليت يانزار ياولدي؟
ج: الحكومة السودانية، قالت الإمارات قدمت ولسه قاعدة تقدم دعم مباشر لقوات الدعم السريع وللميليشيات المتحالفة معاها، عشان ترتكب جريمة الإبادة الجماعية والقتل وسرقة الممتلكات والاغتصاب والتشريد القسري والتعدي على الممتلكات العامة وتخريب الممتلكات العامة وانتهاك حقوق الإنسان ضد قبيلة المساليت والكلام ده من سنة 2023م.
س: ولييه تحديدا سنة 2023م؟
ج: عشان حتى يوم 15 أبريل 2023م، قوات الدعم السريع الحكومة كانت معترفه بيها كقوات نظامية في البلد وكان عندها قانون خاص من برلمان المؤتمر الوطني، عشان كده حددوا التاريخ ده.
س: وناس الحكومة تاني قالوا شنو في الشكوى يانزار ياولدي؟
ج: قالوا الإمارات متواطئة في الإبادة الجماعية على المساليت يا حبوبتي، بتوجيهاتها وتقديمها للدعم المالي والسياسي والعسكري لقوات الدعم السريع المتمردة.
س: وناس الحكومة طلبوا في الشكوى بتاعتهم من المحكمة شنو يانزار ياولدي؟
ج: قالوا أهم حاجة نحنا عاوزين تدابير مؤقتة لحدى ما المحكمة تصدر حكمها النهائي في القضية دي.
س: والتدابير المؤقتة دي شنو يانزار ياولدي؟
ج: التدابير المؤقتة معناها يا حبوتبي، أنه الإمارات تتخذ خطوات من جانبها تمنع بيها قوات الدعم السريع من إرتكاب جريمة الإبادة الجماعية ضد قبيلة المساليت ذي القتل، التعذيب البدني والنفسي؛ التعمد في إلحاق ظروف الحياة بهدف إتلافها ماديا كليا أو جزئيا ؛ فرض تدابير تهدف إلى منع الولادات داخل قبيلة المساليت.
س: وتاني يانزار ياولدي؟
ج: أنه الإمارات ما تقوم بتسليح أي وحدات مسلحة غير نظامية، ولا أي منظمات أو أشخاص خاضعين لسيطرتها، وما يقوموا بأي محاولات لارتكاب إبادة جماعية أو الاشتراك في إبادة جماعية ضد قبيلة المساليت في دارفور.
س: والإمارات قالت شنو؟
ج: يوم 11 مارس 2025م، وكيل دولة الإمارات صرح، بأنه دعوى السودان تفتقر للاختصاص، وأنه الإمارات متحفظة على المادة 9 من اتفاقية الإبادة الجماعية، والدعوى مافيها أي أساس تاني لاختصاص المحكمة، وفوق ده كله بلدنا ما موافقة على السير في الدعوى، ونطلب من المحكمة شطب الدعوى ومسحها من القائمة العامة بتاعت القضايا.
س: أها وبعد داك الحصل شنو؟
ج: يوم 3 أبريل 2025م، الحكومة السودانية رسالت رسالة لمحكمة العدل الدولية، قالت ليهم فيها أنا عاوزة أعمل إضافات على التدابير المؤقتة الطلبتها منكم شهر 3
س: والإضافات الجديدة القدمتها الحكومة السودانية كانت شنو يانزار ياولدي؟
ج:أنه الإمارات تقدم تقرير للمحكمة عن كافة الإجراءات المتخذة لتنفيذ التدابير المؤقتة خلال 30 يوم من إصدار المحكمة لحكمها بخصوص التدابير المؤقتة، وتاني كل 6 شهور لحدى ما المحكمة تصدر حكمها النهائي في القضية.
س: وتاني؟
ج: يوم 10 أبريل 2025م، محكمة العدل الدولية عقدت جلسة استماع عامة في مقرها في لاهاي، بخصوص طلب السودان للتدابير المؤقتة. وبعد ما الجانب السوداني قدم الدعوى القضائية، المحكمة منحت الفرصة لوفد الإمارات عشان يرد على السودان.
س: أها الإماراتيين قالوا شنو؟
ج: الإماراتيين قالوا للمحكمة نحنا عندنا طلبين بس
س: الطلبين هم شنو يا نزار ياولدي؟
ج: أول حاجة: طلبوا من المحكمة رفض الطلب القدمته الحكومة السودانية للتدابير المؤقتة، والحاجة التانية طلبوا من المحكمة شطب القضية من سجلات المحكمة.
س: صحى دولة صربيا وقفت مع الإمارات ضد السودان؟
ج: أيوة يا حبوبتي، يوم 16 أبريل 2025م، صربيا في الدعوى القضائية وأكدت موقف الإمارات وعدم إختصاص المحكمة.
س: تفتكر صربيا لييه عملت كده؟
ج: عشان يوم 12 أبريل 2025م، الحكومة السودانية إعترفت رسمياً بجمهوريةكوسوفو. وده كان رد فعل سريع من صربيا.
س: تفتكر الحكومة السودانية لييه عملت كده؟
ج: بقولوا صربيا قاعدة تزود قوات الدعم السريع بالسلاح.
س: عندى ليك أسئلة سريعة قبل ما تدخل لي في جلسة النطق بالحكم، شنو يعني قاضي ad hoc؟
ج: النظام الأساسي لمحكمة العدل الدولية، بقول ما دام ما قائمة قضاة المحكمة لا تضم قاضي من السودان ومن الإمارات، فبإمكان كل بلد من البلدين اختيار قاضى ad hoc متخصص في القانون الدولي يكون معاهم في سير القضية.
س: وده فعلا تم؟
ج: أيوة يا حبوبتي، السودان اختار القاضي برونو سيما (ألمانيا)، والإمارات اختارت القاضي فيليب كوفرور (بلجيكا).
س: والقضاة الإثنين ديل مسموح ليهم بالتصويت يانزار ياولدي؟
ج: أيوة يا حبوبتي، عشان كده لمن بكرة تشوفي نتيجة التصويت حتلقيها 16 على الرغم من أنه القضاة بمحكمة العدل الآن 14
س: طيب إذا في قضية والأصوات اتساوت فيها7/7 ؟
ج: ذي في الإجتماعات العادية، صوت رئيس المحكمة بكون هو المرجح
س: وأحكامهم ممكن الواحد يعمل عليها إستئناف؟
ج: لا
بكرة جلسة النطق بالحكم، وكلام لأول مرة تسمعوهو
