مالكم كيف تحكمون “القرار 2685”

كتب نزار عبدالقادر صالح

س: الحصل شنو يانزار ياولدي في مجلس الأمن بخصوص السودان؟
ج: قبل ما اقول ليكي يا حبوبتي الحصل شنو ، خليني أقول ليكي إنو يوم 24 مايو 2023م، الممثل الخاص للأمين العام في السودان فولكر بيرتس سافر لنيويورك وقدم إحاطة لأعضاء مجلس الأمن عن الوضع في السودان.
س: قال في الإحاطة دي شنو؟
ج: قال كلام كتير ، إتكلم عن تدهور الوضع الإنساني في البلد، وقال إنو في أكتر من 18 مليون شخص محتاجين للمساعدة، واتكلم عن نهب المستودعات التابعة للأمم المتحدة، واتكلم عن نهب العربات والقوافل والمكاتب.
س: أها وبعد إحاطة فولكر الحصل شنو يانزار ياولدي؟
ج: حصلت كذا حاجة يا حبوبتي، أول حاجة الرئيس البرهان، قال ذي ما حمدوك يوم 27 فبراير 2020م رسل رسالة للأمين العام للأمم المتحدة والأمين العام وافق عليها وعلى الطلبات الكانت جواها ، أنا كمان أرسل رسالة للأمين العام للأمم المتحدة وأطلب منه طلب.
س: وهل البرهان فعلا رسل الرسالة يانزار ياولدي؟
ج: أيوة يا حبوبتي، رسل للأمين العام للأمم المتحدة رسالة وطلب منه فيها، إنو يختار ليهو ممثل تاني ليهو في السودان بدل الألماني فولكر.
س: وهل الأمين العام رد علي رسالة وطلب البرهان؟
ج: المتحدث باسم الأمم المتحدة ستيفان دوجاريك قال: “الأمين العام مصدوم من الرسالة…”
س: طيب واصل وقول لي بعد إحاطة فولكر الحصل شنو؟
ج: يوم 31 مايو 2023م، مجلس الأمن عقد جلسة مشاورات مغلقة بخصوص الوضع في السودان، الأمين العام للأمم المتحدة، بعد ما طلع من الإجتماع صرح وقال:
“في مواضيع بتقع تحت مسؤولية مجلس الأمن وحاجات تانية بتقع تحت مسؤوليتي أنا كأمين عام للأمم المتحدة”.
“الحاجات البتقع تحت مسؤولية مجلس الأمن، إنو يطلع قرار بتمديد ولاية بعثة يونيتامس أو يطلع قرار بإنهاء عمل البعثة في السودان،
أما الحاجات البتقع تحت مسؤوليتي أنا مباشرة، فأنا أعدت التأكيد لأعضاء مجلس الأمن خلال الإجتماع على ثقتي التامة في الممثل بتاعي فولكر بيرتس.
س: يعني غوتيرس ما إشتغل برسالة البرهان وطلب إبعاد فولكر؟
ج: أيوة
س: أها وبعد داك الحصل شنو؟
ج: بعد الجلسة المغلقة، بريطانيا كتبت مشروع قرار بخصوص الوضع في السودان
س: تم التصويت عليه؟
ج: لا، تم إعتماده بالإجماع يوم 2 يونيو 2023م
س: القرار رقمه كم؟
ج: 2685/2023
س: ومضمون القرار شنو؟
ج: أهم فقرة في القرار الخاصة بتمديد ولاية بعثة يونيتامس لمدة ستة شهور، تحديدا حتى 3 ديسمبر 2023.
س: وتاني؟
ج: أعاد مجلس الأمن التأكيد على جميع قراراته وبياناته السابقة الخاصة بالحالة في السودان، وكذلك التزامه القوي بسيادة السودان ووحدته واستقلاله وسلامة أراضيه.
س: وتاني؟
ج: القرار طلب من الأمين العام أن يواصل موافاة مجلس الأمن كل 90 يوم بتقرير عن تنفيذ ولاية بعثة يونيتامس، وحددوا ليهو موعد للتقرير القادم بيوم 30 أغسطس 2023م.
س: طيب شنو الجديد في القرار ده يانزار ياولدي ومختلف عن باقي القرارات الفاتت؟
ج: مافيهو أي حاجة جديدة يا حبوبتي، مجلس الأمن طلع ليهو قرارين بخصوص تمديد ولاية بعثة يونيتامس الأول سنة 2021 و الثاني سنة 2022
س: وعن الحالة العامة في البلد، مجلس الأمن ما قال حاجة؟
ج: في القرار 2685 ماقال حاجة، لكن في بيان صحفي طلع قبل صدور القرار إتكلموا فيهو عن الوضع الحاصل
س: قالوا شنو؟
ج: كالعادة، عبروا فيهو عن قلقهم العميق من استمرار المواجهات العسكرية بين الجيش وقوات الدعم السريع، ودعوا الطرفين لوقف فورى للأعمال العدائية، وتيسير وصول المساعدات الإنسانية، ووضع ترتيب دائم لوقف إطلاق النار، واستئناف العملية الرامية إلى التوصل إلى تسوية سياسية دائمة وشاملة وديمقراطية في السودان.
س: مافي إدانة؟
ج: أدانوا الهجمات على السكان المدنيين وعلى موظفي الأمم المتحدة والأطباء والعاملين في القطاع الصحي ، وأدانوا كمان نهب الإمدادات الإنسانية.
س: والبيان قالوا فيهو تاني شنو؟
ج: جدد فيهو دعم أعضاء مجلس الأمن لخارطة الطريق الوضعها الاتحاد الأفريقي لحل الصراع في السودان.
س: طيب يانزار ياولدي عندي ليك تاني كم سؤال ماعارفة إذا عندك ليهم إجابات الآن وله لا:
السؤال الأول: هل ولاية بعثة يونيتامس حتتغير وله حتبقي ذي ماهي؟
السؤال الثاني: هل بعثة يونيتامس حتشتغل لحدي 3 ديسمبر 2023م من جوه السودان وله من كينيا؟
والسؤال الثالث والأهم: هل فولكر حيظل موجود على رأس البعثة أم حيتم تغييره بزول تاني؟
ج: والله فعلا دي كلها أسئلة مهمة ياحبوبتي والإجابة عليهم للأسف ماعندي
س: طيب عند منو؟
ج: عند مجلس الأمن.
س: يعني نتوقع قرارات تانية من مجلس الأمن؟
ج: أيوة