بقلم اد فتحي الشرقاوي
اوعى تخلي اي شخص
سواء كان قريب منك او غريب عنك يحس أو يشعر أو يلحظ مدى احتياجك لسماع كلمه حلوه منه لك، إن طلعت الكلمة والاهتمام منه يبقى أهلا وسهلا..لكن أنك تتسولها وتطلبها وتٌلِح عليه بها .لأ .وستين لألأ( الاهتمام مابيتطلبش
ولكن بيتْحَسْ)واوعى تطلب الإستحسان من حد ، إنت مش بياع محتاج تُمَركِت وتروج نفسك وذاتك علشان تضمن بيعك لغيرك اللي محتاج يشوفك حلو هيشوفك حلو ولو كنت إنت الوَحَاشه والعفاشه نفسها،واللي محتاج يشوفك وِحِشْ هيشوفك وِحِشْ حتى لو كنت إنت الحلاوةوالجمال نفسه، عاوزك تفتكر دائما أنك مش بياع بتعمل اعلان لنفسك علشان غيرك يقول رأيه فيك ويشتريك ويقتنيك لأ..إنت إنسان لك كرامتك واعتزازك بنفسك، ليه بتطلب منهم يقولوا عليك إنك حلو وشاطر وجدع، ماتسيبهم يقولوا ده من غير ما إنت تطلبه منهم لأنك لو إنت اللي على طول بتلفت نظرهم إنك في حاجه لهم (حبوني/ اهتموا بي/ عبروني/ خدوا بالكم مني، يبقى خليني أقولك إنك شخصية فاقده ثقتها بنفسها وبسبب ضعفك ثقتك ده بتكون محتاج على طول تطمئن على نفسك إذا كانت الناس بتحبك وواقفه جنبك ومعاك ولا…. لأ. وانا بهمس في ودنك وأقولك حاجه..
اوعى تفتكر إنك لما بتطلب من الناس يستحسنوك إنك انت كده بقيت جميل في نظرهم..لأ لأ لأ ، صدقني هم هيقولولك إللي إنت عاوز تسمعه وتشوفه ومش هيحرجوك لأنك إنت اللي بتطلبه منهم.لكن صورتك الحقيقية المرسومة في دماغهم شخص ضعيف ومهزوز ومحتاج كلمتين يمشوه ومعندوش ثقة بنفسه ومن السهل السيطرة عليه والتحكم فيه بالكلمتين اللي عاوز يسمعهم
كفايه كده عليك النهارده🌹
مجردخاطره
ا.د فتحي الشرقاوي
أستاذ علم النفس
جامعه عين شمس
