كتبت نيفين خلة
بحبك يا مصر… ومهما حصل
هتفضلي جوا القلب أوَّل حب
بحبك يا ضحكة فـى وش الغريب
ويا حضن دافي وقت الضيق
بحبك فـ صبحك، فـ صوت التوافيق
فـ راجل طيب بيسعى لرزقُه
فـ ست غلبانة شايلة السنين
بتضحك للصبح برغم الأنين
يا مصر دا نيلك فـى عينيّا مراية
بشوفك فـ وش الحبايب حمايه
وبشوفك فـ المآذن وقت الأدان
وبصوت الكنيسة، وجُوّا الميدان
يا مصر يا حضن ولاد الأصول
اللي عمرهم ما باعوا ولا اتباعوا
يضحوا بالغالي علشان ترابك
وتبقي مرفوعة مهما طالوا
فيكي الشوارع بتحكي الزمن
فيكي الحنين له طعم وشجن
من أول بولاق لحد الزمالك
الهوى فيكي مش ناقص كلام
فيكي أم كلثوم لسه بتغنّي
وصوت عبد الحليم بيدق القلب
تاريخك بحور، ومجدك جبال
وفيكي الأمل يتولد م التعب
يا مصر يا فجر الأمانى الجميله
يا وش القمر فـ عز الضلمة
يا كفّ الفلاح، ويا حلم العامل
ويا حلم أمّ اشتاقت لابنها بضمة
ما بين صعيدك وأهلك فـ بحري
قلوب كتير بتحبك بجد
لو اتكلموا، يردوا الصدا
ويخلوا الصحرا جنة ورود
أنا ابنك، وانتي أمي وناسي
وأرضك وسماكي هما الأساس
لو سافرت آخر الدنيا برجَع
عشان مفيش زي اهلك ناس
