زيزي غريب تكتب .. هونها تهون

كتبت زيزي غريب

هايجي عليكم وقت وتعرفوا إن المواضيع إحنا الي كبرناها زيادة عن اللزوم.. وإن الحياه لا مستاهلة مناهدة وخناق وصراع ، والي عايز يسبقنا يتفضل ، والي بيكلم من ورا ضهرنا هانديله المايك ، والي عايز يشوفنا وحشين يشوفنا ومش هاندافع عن نفسنا ده إحنا نمضيله ونبصم ليه كمان لو حابب. وإن قعدة علي الرصيف مع ناس بتحبك أحلي مليون مرة من دوشة المظاهر الكذابة ، وأن خسارة ناس مالهاش ثلاثين لازمة في حياتك مكسب وإن الي باقيين عليك بجد هايطلعوا أقل من صوابع الإيد وإن الأكل البيتي مافيش أحلي منه ، وإنها مش بعدد الصحاب لكن بالأصيل والصادق منهم وصاحبك الي أمك قالتلك عنه مش مرتاحه ليه كان عندها ألف حق ، وإن الشغل مابتعملش منه صحاب إلا فيما ندر وكل حاجة بتتحل في الأخر بس إحنا الي القلق كان أقوي مننا .. في الأخر هاتكتشف إن الحياه أبسط مما نتخيل ،بسيطة لدرجة ضحكت علينا ببساطتها وخلتنا نعملها الف حساب وشيلتنا الهم ووقفت تضحك علينا من بعيد

كل العلاقات بمختلف انواعها بقت مرهقة جداً ومعقدة جداً .. مااعرفش الناس مصعبين علينا الحياة ليه وهي ماتستاهلش ..
طول الوقت عايشين في ضغط مستمر .. بقت كل مهمتنا في الحياة ندادي ونطبطب ونقول معلش ونقول اسفين بقينا عايشين بس عشان نصالح ونراضي اللي زعل واللي اتقمص واللي خد الكلام علي نفسه .. كل كلمة بقي ليها مليون تفسير وتأويل حسب مزاج كل واحد .. مابقاش في حاجه اسمها (حسن نية) أبداً ..

بقينا نحلل ونفسر كل كلمة وكل حركة وكل نظرة وتحس ان في ناس قاعدة مخصوص كل مهمتها تتصيد الاخطاء لغيرها وتنصب ليهم محكمة وتحاسبهم .. بجد بقيت عيشة تخنق .. وكل مدي كل مابتتأكد ان الانعزال عن الناس هو اسلم حل .. بس المشكلة انك حتي لما تعتزل الناس هما مش هيسيبوك في حالك ..

هيقولو مغرور .. هيقولو متكبر وشايف نفسه .. هيقولو رخم ودمه تقيل ورافع مناخيره في السما .. هيقولو وهيقولو وهيقولو … هتلاقي اللي يفسر بعدك دة بالف تفسير بعيد تماما عن التفسير الحقيقي .. حرام بجد والله كل واحد فيه اللي مكفيه وزيادة .. ماتصعبوش علينا حياتنا اكتر ماهي صعبة .. ماتحملوناش فوق طاقتنا لان خلاص الكيل فاض وطفح والله … ارحمو بعض وسيبو كل واحد في حاله وف همه وفي مسئولياته وخليكم في نفسكم احسن

زمان لما كان حد ميسألش عليا لمدة طويلة كنت بقوله الجملة الشهيرة ( يعني مفيش في يومك ٥ دقايق تسئل عليا فيهم )
بعدين عرفت ان ممكن بالفعل الواحد يكون عنده ٥ دقايق واكتر كمان في يومه بس من التعب والارهاق ومشاكل الدنيا ميقدرش يكلم فيهم حد .. يبقى عاوز يبص فـ السقف كدا بس بدون هدف ويحاول يفصل دماغه من كل احداث اليوم.
– إلتمسوا الاعذار لبعض وبادروا بالسؤال بدون عتاب وتأنيب ..👌🏾🖤

ما تستهونش بحد مشي وهو ساكت، ولا بحد قالك حسبي الله ونعم الوكيل، ولا حتى باللي قال فوضت أمري لله، دي جمل ما ينفعش تعدي كده، ولا ينفع يتسكت عليها، دي حاجات لازم تترجى صاحبها لحد ما يعفو عنك ويشفع لك، وإلا هيبقى عند الله تجتمع الخصوم

ولو جدع بقى اقف قدام ربنا، أو حتى سيب الأيام تعدي عليك يوم ورا التاني وهو لسه بيقول يارب،!!

عشان صدقآ هتتمنى اللحظة اللي لف ومشي فيها ترجع كل ثانية في عمرك لمجرد إنك تقول له حقك عليَّ أنا غلطان..

دايمًا افتكر الله لا ينس ، وما كان ربك نسيا هتجتمعوا هتجتمعوا واللي قلبه كان جامد في الدنيا يبقي يرد علي خصيمه يوم العرض قدام الله عز وجل، ولو قدها سيب اللي قدامك يكمل حسبنه عليك ليل ونهار
وخليه يعدي من قدامك من غير ما ترد الحقوق لاصحابها

عشان هيسيبك تعدي برضه قدامه يوم العرض بس المره دي مش هتعرف تعدي غير بعفوه عنك حتي لو فضلت باقي عمرك بين الصيام والقيام ..

مفيش حسبي الله ونعم الوكيل بتعدي ده تـوكيل ل ربنا .. يعني تفويض لله ومن أشد عدلًا من الله !!!!

نحن لا نستطيع إيقاف الأمواج.. لكننا نستطيع تعلم السباحة.. تلك هي الحياة.. تعلم الصبر.. فليس كل يوم رائع.. والحياة ليست دائماً كما تتمناها.. كلما تعاندنا الحياة فلابد ان نبتسم.. فعند ضفاف ابتسامتنا تنتحر الاوجاع.. فابتسموا رغما عن الالم.. منْ يريدُ القمر لا يتجنَّب اللّيل.. من يرغبُ في الوَرد لا يخْشى أشْواكه.. ومَن يسعى إِلى الحبّ لا يهرب من ذاته