الحياة من الكسر الي الجبر??

كتبت زيزي غريب

الحياة من الكسر الي الجبر??

جبر الخواطر في لحظات الضعف لا ينسى.
مفيش أجمل من إنك تجبر بخاطر شخص عزيز عليك.
أو حد يجبر بخاطرك أنت في وقت محتاجه..

كلنا بنمر بلحظات صعبة
مش بنحتاج فيها غير كلمة تطبطب علينا .
ويهونوا الكسر اللي جوانا..
خليك دايماً من الناس اللي بتجبر بخواطر غيرها:

* عود نفسك إنك تدعي لأي شخص بإن ربنا يجبر بخاطره ويسعد قلبه

* قول صفة جميلة أو حاجة حلوة في الشخص.
اللي قدامك تسعده

* لما تلاقي حد فعلا مضايق ومكسور ما تسيبهوش اجبر بخاطره بكلمة بإنك تحسسه إنه مهم في حياتك
* كل لما تجبر بخاطر حد هتلاقي اللي بيجبر بخاطرك في أكتر وقت محتاجه

وأنت ساعي في جبر خواطر اللي حواليك ربنا هيجبر بخاطرك زي كل مرة بتحس فيها بضعف وخوف وكسرة

لما تمشي مشوار مع حد بقالك سنين وفجأة
تلاقي الحد ده بقى شخص تاني خالص متعرفيهوش؟!

حد ميشبهش، لا من قريب ولا حتى من بعيد،
اللي إبتدى معاك المشوار اللي مشيتوه سوا

حد قرر يفلت إيدك اللي كان ماسكها بقاله سنين
قرر يمشي في طريق تاني إنت مش موجود في

بغض النظر عن الأسباب اللي ممكن تختلف من حكاية للتانية

بس عن إحساسك لما فجأة لقيت نفسك لوحدك

أكنك طفل ماسك في جلبية أمه وفجأة ..
أيديهم فلتت في الزحمة
ولقيت نفسك لوحدك في الطل تاهت

عن إحساس ليلة شتا باردة وإنت مش متغطي
ولا لاقي حاجة تدفي بيها

عن إحساس لما نمت وصحيت.
لقيت نفسك في مكان تاني مع ناس
بتتكلم لغة مش لغتك
لا أنت فاهماهم ولا هم سامعينك

إحساس عنيف بالغربة
بالوحدة بالضياع بالألم اللي بيعصر جسمك

مشاعر متلخبطة
معندكش القدرة إني اوصفها
ولا حتى قادر تقرب لها
نفسك تحط إيدك جواك وتخرجها
بس مش عارف تمسكها

مشاعر صعب تتفهم أو تتحس بسهولة
تجربة غاية في الألم والوجع

قررت بعدها تسكت نفسك وتكتم صوتك للأبد

وتفضل في حيرة مابين .
هو أنا مين؟ أنا فين؟
طب إنت مين؟
هو مين اللي اتغير؟ أنا ولا إنت؟
طب هأعمل إيه أنا دلوقتي؟
أروح فين؟
ده أنت كنت لسه هنا من شوية؟
يعني خلاص بقيت لوحدي؟

متأكد إنك مش ممكن تكون نفسك من تاني
ويفضل عندك شك في إختياراتك
ومعاه تساؤلات ملهاش إجابة

وتلف وترجع تبصي لنفسك من تاني في المرايا
تكلمها وتسألها تاني وتالت
على عشم إنك تلاقي إجابة

بس مش بتلاقي غير نفسك اللي مبقتش نفسك

عن إحساسك اللي واصلني
عن أيدك اللي بتترعش بعد متسابت
عن جسمك البردان ومش عارف يدفا
عن كلامك اللي مش مسموع
عن قلبك المفتور
وروحك اللي راحت منك

عن السنين اللي عدت
عن الساعة اللي وقفت
عن العمر اللي كبر

المقصود من كل كلامي
ناس عرفت تخرج
وناس لسه واقفة مكانها
وناس لسه مجاش عليها الدور بعدك

الموضوع كله عندك
ورسالتي لكل إيد سابت وبعدت

متمشيش طريق مش ناوي تكمله
متسيبش حد في وسط السكة
يمكن يكون مكنش ده طريقه
وغيره مخصوص علشان يكون معاك
بعد الصبر جبر وبعد الجبر ستر

يارب
أينما كان الهدى اجعله طريقنا
وأينما كان الرضا اجعله رفيقنا
وأينما كانت السعادة اجعلها في قلوبنا .