المطبلاتيه…. والرقاصين

بقلم ا.د فتحي الشرقاوي … أستاذ علم النفس جامعة عين شمس

المطبلاتيه…. والرقاصين
هم حملة المباخر وراء كل مسؤل…
بمجرد ما يشوف ولي نعمته في أي حته..تلاقيه على طول استعد بالطبله وهاتك يادرابوكا….بيعزف كل أنواع الايقاعات على حسب الأغنية إللي بتتقال ساعتها

المطبلاتي ده هتلاقيه في كل حته..
في كل وزارة أو إدارة أو قسم أو وحده ومش بعيد كمان لو فتشت كويس ممكن تلاقيه جواك.
الصنف ده من الشخصيات..بيأكل على كل الموائد وما لهوش عزيز ولا غالي و أهم حاجه عنده مين إللي هيفيده علشان يطبله وشعاره ابجني تجدني…

سلوك المطبلاتي فاضح عامل زي صبي العالمه اقصد الرقاصه..???? يتحدث بكل لسان يزين لولي نعمته أي كلام في البتنجان بيقوله. وياسلام لو شوفته وهو ماشي ورا ولي نعمته شايله الشنطه..

هتلاقي كل مشاعر السعاده والزهو والفرح على وشه….بارع في تزييف الحقائق وقلب الاوضاع..
يستمتع جدا بالانحناء والانبطاح لولي نعمته…
بارع في مسح الاعتاب وتقبيل الأكتاف
لا تجد في ملامح وشه أي أثر للكرامة أو ماء الحياء .جلده سميك
لا تجد فيه أثراً لاحساس. ..

والغريب. .إنه محبوب جدا من ولي نعمته وسيده..علشان كده سيده بيفضله وبيميزه بكل المميزات..
ياخد من غير مايبذل أي مجهود..
إلا إذا كان المجهود طبعا الطبل والزمر….
ناس كتير تقولك عاوزين نمنع المطبلاتيه…أقولكم مش هتقدروا
لأن التطبيل والنفاق والرياءبيبقى زي الدم إللي بيجري في عروقه..
وبيني وبينكم كده بالراحه…
هو مين إللي المفروض نقف قصاده ونمنعه..
الطبال إللي ماسك الدربوكه ونازل هز
ولا إللي بيخليه يطبل ومبسوط ومتمزج إنه بيطبله وبيرقصه..
اعتقد إللي محتاج علاج إللي سمح ليه بالتطبيل والرقص والهز
علم النفس علم للحياة…
استقيموا يرحمنا ويرحمكم الله
مجرد خاطره
ا.د.فتحي الشرقاوي
أستاذ علم النفس جامعة عين شمس