الغربة السبب الرئيسي لهدم الأسرة

كتبت زيزي غريب

الغربة و الانفصال العائلي
تعالو نتكلم بصراحه بدون دفن رؤوسنا في الرمال
الغربه أحد أسباب الإنفصال الاجتماعي والعائلي
التفكك الأسري والأمراض النفسية لدي الام واولادها
ومن ثم الاب أيضا ✋
مش الطلاق فقط انفصال لا الغربه أشد قسوة من الطلاق
لأن المطلقه عرفت انها بدون زوج وتواجه الحياة بمفردها
أما الغربه زوج موجود ومش موجود اختزل وجوده في
جمع المال وياريت بيجمع بل معظمهم عايش الشهر بالشهر
توفير المعيشه الكريمه فقط دون ثراء
الخساره أكبر من المكسب افالا تعقلون للاسف الشديد

وجود الزوج في بلد والزوجة في بلد آخرى، بيخلق فجوة بينهما صعب سدها بزيارة كل سنة أو ستة أشهر
والفجوة دي بتظهر في النفور الملحوظ أحياناً، العناد من الزوجة أو تنفيذها طلبات الزوج بعدم إهتمام

بعد وقت الزوجة بتتعود على عدم وجود الزوج، فلما يجي بعد فترات غياب ويحاول يتعامل كزوج ورب للأسرة، بيلاقي صد وعدم تقبل، لأنه كان في معظم الوقت مجرد ضيف مؤقت، مش واحد له سلطة بأي شكل

وجود الزوجة وحدها مع الأطفال لفترات طويلة، بتحول الزوجة من طبيعتها الأنثوية الفطرية ، لطبيعة فيها بعض الخشونة بما أنها تتصرف وحدها وتواجه معظم مشاكل الأطفال وحدها ، بغير زوجها

من أهم أهداف الزواج، هو الإعفاف الجسدي للزوجين،
وغياب نقطة الإعفاف عند الزوج والزوجة، بيخلق مشاكل نفسية عند الطرفين، وعند الزوجة بشكل أكبر، لأسباب نفسية في المقام الأول، لأن الزوجة ترى الإعفاف طريقة لإشعارها بأهميتها ووجودها ،

السيدة قتلت ابناءها وحاولت التخلص من نفسها للاسف يسافر الزوج لسنوات طويلة من اجل لقمة العيش في بلاد أخرى ويترك زوجته تتحمل المسئولية وحدها طبعا الموضوع صعب جدا ولكن نرى توترات نفسية جمة عند كثير من السيدات بسبب سفر الزوج بالإضافة لذلك مؤثر خارجي مثل مشاكل مع عائلة الزوج مثلا السيدة قتلت ابناءها وحاولت الانتحار لانها وصلت لمرحلة نفسية صعبة جدا وطبعا لا علاقة للتدين بالامراض النفسية يعني المرض النفسي ممكن يصيب المتدين وغير المتدين والملحد لان فيه ناس مفاهيمها مغلوطة
ان المتدين لا يصاب بالمرض النفسي

قد يكون السفر لا بد منه نظرا لصعوبة ظروف الحياة ولكن هناك واجبات على الجميع

✍الا تكون مدة السفر سنوات بلا انقطاع وتنسى أسرتك بل على الزوج عمل اجازة باستمرار

✍ابعاد الزوجة عن أي مشاكل قد تؤثر عليها من عائلة الزوج وللأسف بنشوف تدخلات غريبة من عائلات بعض الأزواج

✍دعم الزوجة نفسيا وماديا رأيت ازواجا يرسلون الأموال لامهاتهم وأمه اللي تتولى أمور الزوجة اعتقد هذا شرعا خطأ
بر والدتك نعم ولكن لا تجعلها المتحكمة في زوجتك

✍اذا كانت لك فرصة لتأخذ زوجتك معك فهذا افضل

✍ الدعم النفسي للزوجة وتشجيعها ولو يوميا والا تتركها لحياتها وحيدة تعمل اللى تعمله

اوعى تسافر وتشتغل بره وتسيب مراتك لوحدها هنا
وتقول أنا بابعتلها مصاريف تكفيها وتعيشها كويس
البنت مش بتتزوج علشان المصاريف والفلوس
البنت بتبقى عايزاك انت
عايزة حد يقف معاها ولما تحصل مشكلة تلاقيك معاها
تلاقي حد تتسند عليه وقد الشدة
تلاقي حد تحكيله وتضحك معاه
حد تحتمي فيه وقت الخطر
المشكلة لما تسيبها لوحدها سنين
كتير من الشباب لما يسافر ويسيب زوجته فترات طويلة لما بيرجع بيحس بحاجة غريبة
إن زوجته بتعامله كأنه ضيف تقيل مستنياه يمشي
فبيستغرب مع إنه السبب
المشكلة إن المرأة لما بتتساب لوحدها في مواجهة المشاكل بتتعود تبقى هى راجل البيت

هى إللي تتصرف وتتحرك وتفكر وتدبر
فلما يجي الزوج بعد سنين غياب ويبتدي يمارس دوره بيلاقي عدم تقبل منها فيحتد عليها ويبتدي يقمعها
فيلاقي منها صدود ونفور غريب

انت مش فاهم إنك تحولت لمجرد ضيف
واحد بيبعت فلوس وبس وسيبتها لوحدها كتير
فصعب جدا تيجي تلاقيها نفس البنت الرقيقة
إللي تزوجتها والعيب مش عليها والله

المشكلة التانية هى أولادك لما بتنزل من السفر
مش بتلاقي منهم لهفة وشوق ليك
لأنك ببساطة بالنسبة لهم تحولت من بابا
لــ بابا نويل

واحد ظريف بيجيب لهم هدايا وفلوس
غير كدة لأ

خليك يابني مع زوجتك وأطفالك ولو لازم تسافر يبقى لازم تاخدهم معاك وفي حضنك دايما

وللاسف الشديد نلاقي كتير من المغتربين بيحصل انفصال بينه وبين زوجته لاسباب كتيره

بس السبب الرئيسي البعد لان الاصل فى الزواج (هن لباس لكم وانتم لباس لهن)

والله مش بتبقي إنت في غربة هي اللي بتبقي في غربه
ظروف الحياة وحشه بس مراتك واولادك أولي
بتقولي ماأنا مسافر ومتغرب عشانهم

هقولك اليسير أفضل من ضياع العمر والسنين
وضياع حجات كتير لو سالتها ناقصك أيه مش
هتعرف توصفلك أحساسها

كل يوم يثبت صحة ما نقول من رفض سفر الزوج للخارج بدون زوجته ،
وتركها تتحمل أعباء الاسرة والأولاد مع الوحدة والوحشة والضغوط لفترات طويلة .

هناك بيوت تخرب لغياب الزوج ،
وهناك خيانات تحصل لغياب الزوج ،
وهناك أبناء ينحرفون لغياب الزوج

وهناك من يقول لي ليس الجميع هكذا .
لكنها نسبة لايمكننا إغفالها

وهناك ما يقول لي أن المسافر مضطر للقمة العيش ،
واسأله ، أليس هناك لقمة عيش بغير تركك اسرتك
وزوجتك لشهور وربما لسنين ؟!
الواقع المرير ، أنه قد يعود لهم بعد هذا الغياب محملا بالمال … لكن للاسف سيبحث عن الاسرة التي كان يعمل لاجلها فلن يجدها كما تركها ابدا ?

(هن لباس لكم وأنتم لباسهن لهن )