رحله الي الله بقلب سليم ? ( إِلَّا مَنْ أَتَى اللَّهَ بِقَلْبٍ سَلِيمٍ)

كتبت زيزي غريب

هل سألت نفسك في يوم عن قلبك خاص لوجه الله ✋
ربنا خلقنا متكونين من روح ونفس وجسد وقلب وعقل وكلهم ودائع عندك لكن قلبك اياك تفرط فيه أو تهمله لأنه محل نظر الله تعالى وهو طريقك الى الله هو المضغة اللي تملكها أن صلحت صلح العمل كله وان فسدت فسد العمل كله فالسفر الي الله مش بتمشيله برجلك والا بتركبله عربيات ولا طيارات السفر الى الله بيبقى من خلال القلوب…..

يجي بقي واجهة القلب للعالم الخارجي وهو وشك ده بقى اللي بيقابل الكون بحاله ويسلم عليه اولا وده اللي الناس بتبص فيه عشان تحكم على اللي جواك عشان هو المراية اللي بتعكس اللي جواكم …

وياما ناس بتدفع دم قلبها عشان تجمل الوش لكن يا خسارة لا عمليات ولا ماكياج تقدر تداري انفعالاتكم ومشاعركم ونواياكم وافكاركم ومشاكلكم وخاصة عدم ثقتكم في انفسكم وعدم حبكم لذاتكم والا شعوركم بالحقد أو الذنب أو الغضب أو الخوف أو الكره أو الغيرة أو الصدمة أو عدم الرضا أو الفرح أو السماحة..

فكل تفصيلة في دول بتظهر في تعابير وشكم وعضلاته من خلال لون البشرة أو كرمشة الجلد أو اضطراب العضلات أو إثارة العروق وتفاصيل الوش من عيون لحواجب لاذنين لشفايف لخدود وغيرهم

وشك هو صورتك هو هويتك هو مرايتك الروحية والنفسية والجسدية هو اللي بيقول بتعاني داخليا والا مسترخي ومرتاح تعبان ومرضان والا معافى قريب والا بعيد

فلما تتأثر كرامتك قصاد الناس بنقول خسر ماء وجهه ولما حد بينافقك بنقول عليه بوشين وتلاتة وعشرة وده معناه ان وشه اللي طالعلي وطالع لغيري مزيف ومش حقيقي .

ولما بتبقى شجاع ومواجه للعالم والمواقف بنقول عليك بتواجه الأمر وجها لوجه .

فكل ما كان قلبك سليم كل ما كان وشك منور وكل ما كنت في سلام داخلي ظهر ده على وشك وتفاصيله ويقولولك انت صغرت ونورت ووشك مرتاح وفرحان .

دلوقتي بقى عايزاك تسأل نفسك:
يا تري وشك بيعبر عن حقيقتك؟
يا ترى حاطط قناع والا مجموعة اقنعة؟
يا ترى اللي جوة قلبك بحقيقته حلوة أو وحشة
عايز يخرج ويظهر الفترة ديه؟

واكتب اجاباتك بكل صدق واعرف انت واقف فين عشان تعرف تتحرر بجد..

اللهم يا مقلب القلوب ثبت قلوبنا على قربك ووصالك ومحبتك ورضاك

اللهم اجعل في وجوهنا نور وقلوبنا نور
واجعل لنا بين الناس قبول ???